Berichten

De goeje olde tied

Onderstaande brief is op de redactie binnengekomen. Hier wilden we jullie niet van onthouden.  

De goeje olde tied

Ik heb al un peusken niks meer van mien
laoten heuren maor dat het nog lang niet te
betekenen datter niks gebeurt is op de klup.
Dat kö’j begriepen. Ut is wel allemaols pröttel
en driet maor wat wil i’j dan ook met zo’n
zootjen ongeregeld.
End veurig jaor mossen wi’j ut kluphuus uut.
Waorum? Dat wet gin mens. Ut zal dus wel
weer liggen an ut mismennisjmunt van ut
bestuur. Ut zellefde gong ut met ut krentje dat
wi’j twee keer in ut jaor kregen. Ze mossen zo
neudig met de tied met zei de veurzitter. I’j
hept ondertied wel begreppen dak met die
hoge heren weinig op hep. Toch mok zeggen
dat ze ok wel is wat goeje dingen doet. Ik ziet
ow al vraogen wat dat dan wel weazen mag.
Dat kan ik ow gauw vetellen; ze hemmen de
kompetitielijer der uut gedaon. Dat mos ok
wel want ut begon wel erreg op te vallen dat
den keal elk jaor met un bèker naor huus
gong. Wi’j wetten onderhand wel hoe of e dat
veur mekaar boksen en dan wil ik ut nog niet
ens hemmen aover de bèker. Elk jaor zatte in
de finale. Ut geheim zat in ut lotten watte
altiet zellef dei’j. Doar is now mooj un end an
gekommen.
Met den ni’jen is ut ter wel op veuruit gegaon.
Moar blief ze in de gaten hollen want at ze
der un peusken zit kriegen ze allemaols de
eigeste fratsen.
Un paar keer in ut jaor hollen ze un
vegadering, die opvrèters. De letste keer
hemmen ze geliek maor beslaoten dat de
sikkeretaris der ok nog uut mos. Ut het wel
lang geduurd maor ze kregen endeluk in de
gaten dat den keal der niks van braojen.
Now hew un peusken vakansie. Da’s net as
met kesmis. I’j wod dan vaak un bietje
melamongolies.
In zo’n bu’j bedach ik bi’j mienzellef da’k
toch weer terugvelangen naor die tied da’w
nog in ut olde kluphuus zatten, dat de
competitielijer alles nog bi’j mekaar kon
sjoemelen, dat elk jaor den eigesten kampioen
wier, dat Get en Everard nog jonge keals
wazzen en dat de veurzitter nog un bos met
heur had.
Maor jao, die goeje olde tied kump ja nooit
meer trug.
Bennad van de Stikken Drei’j

Informatie

Opgericht anno 1997

Privacy- en cookiebeleid

Speellocatie

Antonia Azora
Industrieweg 115
7061 AP  Terborg

Agenda

22 sep 2026
Beker wedstrijd ronde 1
29 sep 2026
SOS wedstrijd ronde 1
06 okt 2026
Keizer competitie 26/27 ronde 4